အင်ဒိုနီးရှားနှင့်ထိုင်းနိုင်ငံတို့သည်နိုင်ငံဖြတ်ကျော် QRစနစ်ဖြင့် ငွေပေးချေခြင်း အစီအစဉ်အား အကောင်အထည်ဖော်ဆောင်ရွက်ခဲ့ပြီး နှစ်နိုင်ငံကြား ရှိစားသုံးသူများအနေဖြင့် ကုန်စည်နှင့် ဝန်ဆောင်မှုများ ဝယ်ယူ/ရောင်းချခြင်းတို့အတွက် မိုဘိုင်းအပလီကေးရှင်းများမှတစ်ဆင့် ငွေပေးချေမှုများဆောင်ရွက်နိုင်မည်ဖြစ်ပါသည်။

ယခုဆောင်ရွက်ချက်သည် အရှေ့တောင်အာရှနိုင်ငံမျာအကြား ဒီဂျစ်တယ်စီးပွားရေး အဆင့်မြှင့်တင်မှုသဘောတူညီချက်နှင့်အညီ ဆောင်ရွက်ခြင်းဖြစ်ပြီး အရှေ့တောင်အာရှနိုင်ငံများရှိ စားသုံးသူများအနေဖြင့် နိုင်ငံဖြတ်ကျော်ငွေပေးချေးမှုများအား လွယ်ကူလျှင်မြန်စွာ ဆောင်ရွက်သွားနိုင်မည်ဖြစ်ပါသည်။

ထို့ပြင် QR စနစ်ဖြင့် ငွေပေးချေခြင်းအစီအစဉ်သည် ဒေသတွင်းနိုင်ငံများအကြား  ငွေရေးကြေးရေးပူးပေါင်းဆောင်ရွက်မှုကိုအားပေးရာရောက်ပြီး ဘဏ်စနစ်နှင့်မရင်းနှီးသေးသောသူများနှင့် ဘဏ်စနစ်ရင်းနှီးပြီးသောသူများအကြား များစွာအထောက်အပံ့ဖြစ်စေပါသည်။

အင်ဒိုနီးရှားနိုင်ငံနှင့်ထိုင်းနိုင်ငံတို့သည် လွန်ခဲ့သောနှစ်မှစ၍ နိုင်ငံဖြတ်ကျော်၍ QR စနစ်ဖြင့် ငွေပေးချေမှုအစီအစဉ်အားအောင်မြင်စွာ အကောင် အထည်ဖော်ဆောင်ရွက်ခဲ့ပြီးဖြစ်ပါသည်။

အင်ဒိုနီးရှားနိုင်ငံသားမျာအနေဖြင့်ထိုင်းနိုင်ငံရှိကုန်စည်နှင့်ဝန်ဆောင်မှုများဝယ်ယူ/ရောင်းချခြင်းတို့အတွက် ထိုင်းနိုင်ငံ QR Code အားဖတ်၍ ငွေပေးချေမှု ဆောင်ရွက်နိုင်မည်ဖြစ်ပါသည်။ အလားတူပင် အင်ဒိုနီးရှားနိုင်ငံရှိ ကုန်စည်နှင့်ဝန်ဆောင်မှုများ ဝယ်ယူ/ရောင်းချခြင်းများအတွက်လည်း QRIS မှတစ်ဆင့် ငွေပေးချေမှုများ ဆောင်ရွက်နိုင်မည်ဖြစ်ပါသည်။ အဆိုပါ စနစ်တွင် ပါဝင်ဆောင်ရွက်လျက်ရှိသော နည်းပညာကုမ္ပဏီပေါင်း (၇၆) ခုရှိပြီး ယခုထက်ပိုမိုများပြားလာမည်ဟုလည်း မျှော်မှန်းထားပါသည်။

အင်ဒိုနီးရှားဗဟိုဘဏ်သည်ထပ်မံ၍ စင်ကာပူ၊ မလေးရှားနိုင်ငံတို့နှင့်လည်း QR စနစ်ဖြင့်ငွေပေးချေမှုအစီအစဉ်အား စမ်းသပ်ဆောင်ရွက်လျက်ရှိပါသည်။ စင်ကာပူနိုင်ငံနှင့် ၂၀၂၃ ခုနှစ်တွင် စတင်သွားရန်ရည်ရွယ်ထားပြီး ဖြစ်ကြောင်း၊ အလားတူပင် မလေးရှားနိုင်ငံတွင်လည်း ၂၀၂၂ ခုနှစ်၊  ဇန်နဝါရီလကတည်းက စတင်ခဲ့ပြီး ၂၀၂၂ ခုနှစ် ကုန်ဆုံးချိန်တွင် စတင် အသုံးပြုနိုင်ရန် မျှော်မှန်းထားပါသည်။

အာဆီယံစီးပွားရေးနှင့်ကူးသန်းရောင်းဝယ်ရေးဆိုင်ရာသဘောတူညီချက်

နိုင်ငံဖြတ်ကျော် QR စနစ်ဖြင့် ငွေပေးချေမှုအစီအစဉ်သည် အာဆီယံစီးပွားရေးနှင့် ကူးသန်းရောင်းဝယ်ရေးဆိုင်ရာ သဘောတူညီချက်နှင့်အညီ ဆောင်ရွက်နေခြင်းဖြစ်ပြီး အရှေ့တောင်အာရှနိုင်ငံများအကြား အီလက်ထရောနစ်ကုန်သွယ်မှုစနစ်အား ထောက်ပံ့ပေးနိုင်ရန်အပြင်ဒေသတွင်း      ဒီဂျစ်တယ်စီးပွားရေးစနစ်အား အဆင့်မြှင့်တင်နိုင်ရန် ရည်ရွယ်ပါသည်။ ထို့ပြင် နိုင်ငံဖြတ် ကျော် QR စနစ်ဖြင့်ငွေပေးချေမှုအစီအစဉ်မှာလည်း ယင်းသဘောတူညီချက်၏ အရေးကြီးသော အစိတ်အပိုင်းတစ်ခုပင် ဖြစ်ပါသည်။

အရှေ့တောင်အာရှနိုင်ငံများအကြား အီလက်ထရောနစ်ကုန်သွယ်မှုစနစ်သည် ကမ္ဘာနှင့် အဝှမ်းကိုဗစ်-၁၉ရောဂါ ဖြစ်ပွားနေစဉ်ကာလအတွင်း လျှင်မြန်စွာတိုးတက်လာခဲ့ပြီး ၂၀၂၅ ခုနှစ် တွင် အင်တာနက်စီးပွားရေးမှ စုစုပေါင်းကုန်သွယ်မှုပေါင်း အမေရိကန်ဒေါ်လာ ၃၅၀ ဘီလီယံခန့် ရှိပြီး ၂၀၃၀ ခုနှစ်တွင် အမေရိကန်ဒေါ်လာ တစ်ထရီလီယံထိ တိုးမြင့်လာနိုင်မည်ဖြစ်ပါသည်။ ဒီဂျစ်တယ် စားသုံးသူများနှင့် ကုန်သည်များ များပြားလာရခြင်းမှာ အွန်လိုင်းမှ အစားအစာများ မှာယူခြင်းလုပ်ငန်းနှင့် အီလက်ထရောနစ်ကုန်သွယ်မှု တို့ကြောင့် ဖြစ်ပါသည်။

အရှေ့တောင်အာရှနိုင်ငံများ၏ အသေးစား၊ အလတ်စားစီးပွားရေးလုပ်ငန်းများ အပေါ် QR စနစ် ဖြင့် ငွေပေးချေမှု မည်သို့ ပိုမိုခိုင်မာလာနိုင်ကြောင်း

အသေးစား၊ အလတ်စား စီးပွားရေးလုပ်ငန်းအများစုမှာ သာမန်မဟုတ်သည့် ကဏ္ဍတစ်ခု တွင်ရှိနေသည့် အားလျော်စွာ ဘဏ်စနစ်အားမရင်းနှီးသေးသောသူများဖြစ်စေ၊ ဘဏ်စနစ်အား ရင်းနှီးပြီးသောသူများဖြစ်စေ အဆိုပါ QR စနစ်ဖြင့် ငွေပေးချေမှုအစီအစဉ်မှာ အရှေ့တောင်အာရှ နိုင်ငံများ၏ အသေးစား၊အလတ်စားစီးပွားရေးလုပ်ငန်းများအတွက်များစွာ အထောက်အပံ့ ဖြစ်စေ မည်ဖြစ်ပါသည်။ ဒေသတွင်းလူဦးရေ၏ ၅၀ ရာခိုင်နှုန်း (လူဦးရေ ၃၀၀ မီလီယံခန့်)မှာ ဘဏ်စနစ်အား မရင်းနှီးသေးသောသူများဖြစ်ပြီး ၂၄ ရာခိုင်နှုန်းခန့်မှာ ဘဏ်စနစ်ရင်းနှီးပြီးသူများဖြစ်ကြောင်း ခန့်မှန်းရရှိပါသည်။

ငွေရေးကြေးရေးပူးပေါင်းဆောင်ရွက်မှုလုပ်ငန်းစဉ်မှာ အရှေ့တောင်အာရှနိုင်ငံများအကြား ကွဲပြားခြားနားလျက်ရှိပြီး စင်ကာပူနိုင်ငံမှာ ကမ္ဘာပေါ်တွင် ငွေရေးကြေးရေး ပူးပေါင်းဆောင်ရွက်မှု အားအကောင်းဆုံး နိုင်ငံတစ်နိုင်ငံဖြစ်နေသည့်အချိန်တွင် ဗီယက်နမ်နိုင်ငံလူဦးရေ၏ ၇၀ ရာခိုင်နှုန်း ၊ ဖိလစ်ပိုင်နိုင်ငံလူဦးရေ၏ ၆၅ရာခိုင်နှုန်းနှင့် အင်ဒိုနီးရှား နိုင်ငံလူဦး၏ ၅၀ ရာခိုင်နှုန်း ဘဏ်စနစ်မရင်းနှီးသေးသော သူများဖြစ်ပါသည်။

အရှေ့တောင်အာရှနိုင်ငံများအကြား ငွေရေးကြေးရေးပူးပေါင်းဆောင်ရွက်မှု အစီအစဉ်ဆိုင်ရာ အခက်အခဲအတားအဆီးများ

ငွေသားသည်သာအဓိက

အသေးစား၊ အလတ်စား စီးပွားရေးလုပ်ငန်းအများစုမှာ သာမန်မဟုတ်သည့် ကဏ္ဍတစ်ခုတွင်ရှိပြီး အထူးသဖြင့် ကျေးလက်ဒေသများနှင့် လစာဝင်ငွေနိမ့်ပါးသည့် အဖွဲ့အစည်း များသည် လုပ်ခလစာများအား ငွေသားဖြင့်သာပေးချေလေ့ရှိပါသည်။ ဘဏ်စာရင်းမရှိသည့်အတွက် အရှေ့တောင်အာရှနိုင်ငံများရှိ လုပ်ငန်းများနှင့် ၎င်းတို့၏ လုပ်သားများမှာ ဘဏ်ချေးငွေချေးယူဖူးသည့် ရာဇဝင်မရှိသည့်အပြင် ငွေရေးကြေးရေးဝန်ဆောင်မှုများနှင့်လည်း အလှမ်းကွာဝေးလျက်ရှိပါသည်။

ငွေရေးကြေးရေးဆိုင်ရာ အသိအမြင်

ငွေရေးကြေးရေးအသိအမြင် ဗဟုသုတနည်းပါးခြင်းသည် အရှေ့တောင်အာရှ နိုင်ငံများအ တွင်း ငွေရေးကြေးရေးဝန်ဆောင်မှုရရှိနိုင်မှုအပေါ်အကျိုးသက်ရောက်စေနိုင်ပါသည်။ ဒေသ တွင်း အရွယ်ရောက်ပြီး လူဦးရေ၏ ၃၀ ရာခိုင်နှုန်းမှာ ငွေရေးကြေးရေးအသိအမြင် ဗဟုသုတနည်းပါးသည်ကို တွေ့ရှိရပါသည်။

ငွေရေးကြေးရေးပူးပေါင်းဆောင်ရွက်မှု အရှိန်အဟုန်မြှင့်တင်စေရေး

မိုဘိုင်းတယ်လီဖုန်းများ၏အရေးပါမှု

အရှေ့တောင်အာရှနိုင်ငံများရှိ လူဦးရေအများစုတွင် ဘဏ်စာရင်းထက် မိုဘိုင်းဖုန်းများ ပိုင်ဆိုင်ကြခြင်းသည်ဒေသတွင်းငွေရေးကြေးရေးပူးပေါင်းအစီအစဉ်တွင်ပါဝင်ရန် အတွက် အဓိက သော့ချက်ဖြစ်စေပါသည်။ ထိုမှတစ်ဆင့် မိုဘိုင်းဝေါလက် အနေဖြင့် အသုံးပြု နိုင်မည့်အပြင် QR စနစ်ဖြင့် ငွေပေးချေမှုအား အသုံးပြုနိုင်စေမည် ဖြစ်ပါသည်။

အရှေ့တောင်အာရှနိုင်ငံများတွင် လတ်တလော အသုံးပြုလျက်ရှိသည့် မိုဘိုင်းဝေါလက် အမည်များမှာ GrabPay, GoPay, OVO, MoMo နှင့် PayFazz တို့ဖြစ်ပါသည်။ ၎င်းတို့အား ကျော်၍ စားသုံးသူများအနေဖြင့် ဘဏ်စာရင်းမရှိသော်လည်း အွန်လိုင်းငွေပေးချေမှုများအား ဆောင်ရွက်နိုင်မည် ဖြစ်ပါသည်။ ထို့ပြင် စားသုံးသူများနှင့် လုပ်ငန်းများအနေဖြင့် ဒီဂျစ်တယ် ဝေါလက်များ သုံးစွဲခြင်းဖြင့် ငွေရေးကြေးရေးလုပ်ဆောင်ချက်များနှင့် စားသုံးသူများ၏ လတ်တလော ကြိုက်နှစ်သက်မှုဆိုင်ရာ အချက်အလက်များအားလည်း ရရှိစေနိုင်မည် ဖြစ်ပါသည်။

အီလက်ထရောနစ် ဝေါလက်ကဏ္ဍအတွင်းရှိ နိုင်ငံခြားရင်းနှီးမြှုပ်နှံသူများအတွက် စားသုံးသူများ၏ ကြိုက်နှစ်သက်မှုကို ဦးစားပေးရန်မှာ အရေးကြီးပြီး စားသုံးသူများမှ ပြည်တွင်းငွေပေးချေမှုစနစ် သုံးစွဲလိုပါကသုံးစွဲရန်ခွင့်ပြုသင့်ပြီး မိုဘိုင်းငွေပေးချေမှုဖြင့် ပေးချေလိုပါကလည်း ခွင့်ပြုပေးရမည် ဖြစ်ပါသည်။

Peer-to-Peer (P2P) စနစ်ဖြင့် ငွေချေးခြင်း

အရှေ့တောင်အာရှနိုင်ငံများရှိ အသေးစား၊ အလတ်စားစီးပွားရေးလုပ်ငန်းအများစု၏ လုပ်ငန်းစံနှုန်းပုံစံများမှာ ဘဏ်များနှင့် အခြားငွေရေးကြေးရေးအဖွဲ့အစည်းများမှ ဝန်ဆောင်မှုပေးနေသည့် ငွေကြေးဝန်ဆောင်မှုလုပ်ငန်းများအတွက် သတ်မှတ်ချက်များနှင့်ကိုက်ညီမှု မရှိသည်ကို တွေ့ရှိရပါသည်။ ဥပမာအားဖြင့် ချေးငွေပြန်လည်ပေးဆပ်မည့်သက်တမ်းနှင့် ပေးဆပ်မည့်ပုံစံ၊ အပေါင်ပစ္စည်းပေးနိုင်မှုအခြေအနေ၊  ချေးငွေအရည်အသွေးဆိုင်ရာ ကန့်သတ်ချက်နှင့် အခြားတို့ ဖြစ်ပါသည်။

P2P စနစ်ဖြင့် ငွေချေးခြင်းဆိုသည်မှာ ဘဏ်စနစ်အားမရင်းနှီးသေးသောသူများနှင့် ဘဏ်စနစ်ရင်းနှီးပြီးသောသူများအတွက် ဝန်ဆောင်မှုပေးနေသည့် ချေးငွေအမျိုးအစားတစ်မျိုး ဖြစ်ပါသည်။ အင်ဒိုနီးရှားနိုင်ငံတွင် အဆိုပါ ချေးငွေဝန်ဆောင်မှုပေးရန် ငွေရေးကြေးရေး ကုမ္ပဏီပေါင်း (၁၆၀) ကျော်မှာ မှတ်ပုံတင်ထားပြီးဖြစ်ပြီး ၂၀၂၀ ခုနှစ်တွင် အမေရိကန်ဒေါ်လာ ၇ ဘီလီယံ ကျော် ထိထုတ်ချေးပြီး ဖြစ်ပါသည်။ အဆိုပါ အသေးစားချေးငွေလုပ်ငန်းမှာ ပိုမိုလူသိများလာပြီး အမေရိကန် ဒေါ်လာ (၁၀၀) အောက် ပမာဏများအတွက် (၂၄)နာရီ မပြည့်မီ အချိန်တိုကာလ အတွင်းထုတ်ချေးပေးနိုင်ပါသည်။ ထို့ပြင် ချေးငွေကာလနှင့် သက်တမ်း စေ့ရောက်မည့်ကာလမှာ နည်းပြီး ရက်သတ္တပတ်အနည်းငယ်အတွင်း ပြန်လည် ပေးဆပ်ရမည် ဖြစ်ပါသည်။

( ကေသွယ်ခိုင်၊ စီမံကိန်းနှင့်ဘဏ္ဍာရေးဝန်ကြီးဌာန)